[TRIBUNA] A capitalidade do Bierzo

XABIER LAGO MESTRE | Nunha conversa de taberna con vilafranquinos xurdíu, entre vasos de viño caseiro, o debate pola capitalidade histórica do Bierzo. Na procura de probas alguén entrou na internet co seu móbel. Velaí o artigo dun tal David Díez Llamas, no que lemos “históricamente la capitalidad del Bierzo le corresponde a Villafranca”, e engade, incluso cabría poner en cuestión si es correcto que ese papel de capitalidad que algunas veces se atribuye a Ponferrada” (Ileón, 2023), En fin, outra toulería deste escritor leonesista de sona. Nembargantes, a historiografía berciana ten este debate moi clarexo.

Toda esta problemática indica o descoñecemento histórico que hai nesta rexión e máis en León. Por iso facemos un rápido percorrido pola documentación para fundamentar o tema da capitalidade do Bierzo. E principiamos en 1486 cando os chamados Reis católicos mercan Ponferrada aos que serían marqueses de Vilafranca. A Coroa trataba con esta operación política de establecer unha vila reguenga no Bierzo. Pretendíase fixar a capitalidade da nova provincia do Bierzo en Ponferrada, baixo o control dos sucesivos corrixidores reais, “corregidor de Ponferrada con la provincia del Bierzo” (1489). Mentres que Vilafranca sería a capital do novo marquesado señorial. Por suposto, ninguén dubida que a xustiza e o poder real sempre estarían por enriba da señorial dos alcaldes maiores do marquesado.

A Coroa organiza territorialmente a nova provincia do Bierzo para servir mellor aos seus intereses políticos. Referímonos á execución das diversas políticas gobernativas, xudiciais, fiscais, militares, económicas, etc. Serían os corrixidores de Ponferrada os que cumprirían as ditas políticas. A nivel fiscal, cando hai que recadar os diversos impostos reais, lemos “la villa de Ponferrada y provincia del Bierzo” (1521), porque Ponferrada é referencia tributaria para a facenda real, capital do correspondente distrito fiscal.

Ponferrada elabora un Memorial de agravios (1622) contra el traspaso da recadación das alcabalas aos marqueses de Vilafranca, “daños que padece aquella aflixida gente, y de lo mucho que ymporta a la Corona Real aquella villa (Ponferrada) y Provincia (El Bierzo), así por ser cabeza de un tan grande partido”. Cando os bercianos reclaman, en Cortes de 1657, a redución de impostos, a referencia é ao “partido de Ponferrada”, porque é a capital fiscal do Bierzo. O rei Carlos II remite carta aos corrixidores de León, Ponferrada e Sahagun (1668) para que se paguen as alcabalas (imposto sobre o comercio), como destacados centros políticos. En Cortes castelás de 1611, León ostenta a representación política de varios territorios, “por su provincia, por la ciudad de Oviedo y su principado, y por la ciudad de Astorga, y provincia de Ponferrada y El Bierzo”, vemos de novo a capitalidade berciana en Ponferrada.

No século XVIII Ponferrada protesta polo pago de alcabalas sobre o viño fronte a Vilafranca, “de cuya igualdad y equidad no desmerecemos por ser esta villa realenga y capital de aquella y de todos los pueblos de la Provincia del Bierzo y sus montañas” (1738). Resta claro cal é a capital do Bierzo. Tamén a villa de Ponferrada é centro recadador de impostos, como indican en Cabanas Raras, “las cargas que tiene este pueblo y su común de servicio hordinario y extraordinario (…) paga en la villa de Ponferrada” (1753), ou “Gestoso paga a el año por razón de Ciento en Arcas Provinciales de Ponferrada”. O político Antonio de Capmany elaborou un Diccionario geográfico (1783), no cal escribe “pequeña provincia de España en el obispado de Astorga, cuya capital es Ponferrada”.

Ante a invasión napoleónica, O Bierzo se organiza militarmente, fórmase o “departamento de Ponferrada, que comprende todos los Pueblos, conocidos bajo el nombre de la Provincia del Bierzo” (1808). Nova vinculación entre Ponferrada e maila súa provincia histórica. Agora ben, o establecemento do exército de Galicia en Vilafanca pode cuestionar de feito a dita capitalidade do Bierzo. Ben certo é que durante o Trienio liberal as Cortes fixan Vilafranca coma a capital berciana (1821).

Trala volta do absolutismo real, recupérase a vella provincia histórica, “Ponferrada, villa realenga en el reino de León, cabeza de partido que comprende 26 jurisdicciones”, segundo Miguel de Burgos (Noticia jurisdiccional, 1824). El Diario Balear recolle, en 1829, “Ponferrada como capital del partido del Vierzo”. Sen embargo, en 1834 O Bierzo queda dividido en dous partidos xudiciais, Vilafranca e Ponferrada. O ministro Pascual Madoz refírese ao partido administrativo de Ponferrada (1850). Mais o centralismo intentou suprimir este partido en 1853, finalmente “quedando únicamente subsistentes, por ahora, atendidas las circunscripciones exceptuando de los mismos (…) Ponferrada”. Logo esta vila do Sil segue a ser a capital berciana.

Queremos recordar unha anédota protagonizada polo procurador síndico de Vilafranca, Isidro Andrés Ovalle, no xornal El Esla (1860). Este político protestou ante o xornal El Correo de Lugo porque nel se indicaba que “es población aún más considerable Ponferrada, que fue con frecuencia capital del Vierzo y también de la provincia”. O político vilafranquino indignouse, alegando que Ponferrada “es inexacto que haya sido jamás cabeza de provincia”. Como temos demostrado, Ponferrada durante a Idade Moderna foi capital provincial, mais supoñemos que o descoñecemento deste feito histórico era xeneralizado no século XIX.

A nivel fiscal, existe tesorería en León y depositaría en Ponferrada en la segunda metade do século XIX. De novo Ponferrada capital do partido fiscal para a recadación dos impostos (consumos, contribucións rústica e industrial, imposto da sal, rentas estancadas). Sendo Vilafranca unha administración subalterna con Bembibre e A Ponte Domingo Flórez (1877). Sen embargo, a dita oficina de Vilafranca quixeron suprimila, por iso o deputado Saavedra Balgoma tivo que defender a súa existencia en 1890. Finalmente, no século XX o desenvolvemento capitalista na rexión do Bierzo (industria, mineiría, ferrocarril, comercio…) precisou dun grande centro urbano en Ponferrada. Paseniño esta cidade converteuse na capital de feito do Bierzo, pola prestación de todo tipo de servizos públicos e privados, que no século XXI case ninguén cuestiona.