Aumentan os estudantes de galego no Bierzo e Seabra, que se achegan a 1.200
O secretario xeral de Política Lingüística participou nos actos organizados pola Comisión Cultural Martín Sarmiento en colaboración coa Xunta de Galicia que se desenvolveron ao longo da xornada en Vilafranca, Cacabelos e Corullón.
Coincidindo co 325º aniversario do ilustre berciano Frei Martín Sarmiento, o Bierzo celebrou este luns o seu Día da Lingua Galega. O secretario xeral de Política Lingüística, Valentín García, participou, a canda 1146 estudantes de galego, na celebración que tivo lugar nas localidades de Vilafranca, Cacabelos e Corullón. Os actos estiveron organizados pola Comisión Cultural Martín Sarmiento co apoio da Xunta de Galicia e da Junta de Castilla y León, entre outras entidades.
Valentín García lembrou que este curso escolar “medrou en 34 o número de alumnos e alumnas que se incorporaron ao Programa de promoción do galego no Bierzo e Sanabria para estudar o galego e en galego” e expresou a súa satisfacción porque “cada ano somos máis os que nos reunimos aquí co fin de mostrar a nosa aposta pola lingua propia de Galicia e garantir o seu futuro nestas terras que, fóra das da nosa Comunidade, son tamén galegofalantes”.
Por terceiro ano consecutivo, verificouse un incremento de alumnado, tanto nos ensinos infantil e primario coma no secundario e na escola oficial de idiomas: sobe en 14 estudantes no primeiro caso, en 15 no segundo e en cinco no terceiro, 34 en total. Así, os datos de alumnado quedan como seguen: 941 alumnos na educación infantil e primaria (fronte aos 927 do curso anterior), 148 alumnos na educación secundaria (fronte aos 133 do curso anterior) e 57 alumnos na Escola Oficial de Idiomas de Ponferrada (fronte aos 52 do curso anterior).
